Көктемнің шуағы төгіліп, табиғат оянып, жаңа күннің жарқын таңы атты
Көктемнің шуағы төгіліп, табиғат оянып, жаңа күннің жарқын таңы атты. Ұлыстың ұлы күні – Наурыз мерекесі 67 гимназияда ерекше сән-салтанатымен тойланды. 2-3 сынып оқушылары ата-аналарымен бірге бір шаңырақ астына жиналып, кең дастарқан жайып, қазақтың ұлттық тағамдарымен бөлісті.
Мерекенің сәні – балалардың күміс күлкісі мен әуелеген әндері болды. Олар ұлттық киімдерін киіп, “Қара жорға” биін билеп, әсем әндерін шырқап, Наурыз туралы өлеңдер оқыды. Ата-аналар да шет қалмай, өз өнерлерін көрсетіп, қазақтың дархан көңілі мен қонақжайлығын паш етті.
Бұл күн – тек мереке ғана емес, ұрпақтан-ұрпаққа жалғасатын ұлттық дәстүрдің сабақтастығының көрінісі еді. Дастарқан басында ақ тілек айтылып, береке мен бірлікке, ынтымақ пен татулыққа шақырған ізгі сөздер өрбіді.
Наурыздың шуақты мейрамы мектеп қабырғасында көтеріңкі көңіл-күймен тойланып, жас ұрпақтың жүрегінде мейірім мен ұлттық рухтың отын жақты. Ұлыстың Ұлы күні құтты болсын!